Jólaguðspjallið er dulspekileg fræðsla - 4. hluti

... Eðli jólasögunnar er: Ljósið, sem skín í myrkrinu, eins og segir í Jóhannesarguðspjalli.

Uppljómun sálarinnar, sameining hinnar persónulegu og hinnar æðri vitundar, er eins og ljós í myrkri hins persónulega lífs.

Og nú nálgumst við hinn mikla atburð þessarar nætur.

María á að tákna hina æðri hugsun, þessa, sem stundum er kallað orsakalíkami. Jósef er hin hlutræna eða hin persónulega hugsun, lægri huglíkaminn. Það er ekki rúm fyrir þau í gistihúsinu, af því að maðurinn er orðinn þannig, að hann fellur illa inn í venjulegt líf. Þess vegna fara þau í fjárhúsið sem táknar tilfinningalífið, geðlíkamann. Þar inni eru tamin dýr, góðlynd og gæf. Það eru þrár, langanir og tilfinningar, sem búið er að temja, orðnar auðsveipar og ljúfar.

Það er kyrrt úti, alls staðar kyrrð, nema í gistihúsinu, mannlífinu. Slík kyrrð er undanfari hins mikla viðburðar. Það er eins og hinni dimmu nótt fylgi þessi dauðaþögn í sálinni. Ekkert bærir á sér. Dýrin eða tilfinningarnar hreyfa sig ekki, sauðféð úti á völlum, lægra, eðlið og eðlishvatirnar blunda undir vökulli gæzku fjárhirðanna, hinna góðu hæfileika og mannkosta, sem vaka, en eru sjálfir hljóðir, því að allt er hljótt, ekkert sérstakt, vekefni. Nótt er ekki bara myrkur, hún er líka hvíld. Hvíldin táknar hina innri kyrrð.

Í hugrænni þjálfun er þessi jólanæturkyrrð það ástand hugsunar og vitundarstarfs, þegar allt er opið í vitundinni, allt vitundarstarfið er meðvitað, en þó hvergi gára, áreynslulaus innri kyrrð. En samt er allt myrkt, hvergi glæta, Öll ljós höfðu reynzt villuljós. Hið sanna ljós í myrkrinu er ekki enn kviknað. ...

... En svo gerist undrið.

Það kemur öllum á óvart, og enginn veit, fyrr en það hefur gerzt.

Kristsbarnið, einstaklingseðlið, er fætt í sálinni, hin guðlega vitund hefur tekið sér bústað í persónuleikanum.

Ljósið skín í myrkrinu, eins og segir í Jóhannesarguðspjalli.

 

 

Sigvaldi Hjálmarsson - Andi jólanna. Grein í Ganglera, hausthefti frá árinu 2008.

Meditation means there is no awareness of mind

 

Meditation means there is no awareness of mind, thought, bodily sense, and worldly sense. How is one to attain that state? It depends upon sincere practice of the techniques.

 

Paramahamsa Hariharananda