Ljóð Inkans

Í vor kom út bókin Ljóð Inkans eftir síðasta keisara Inkanna, Atahuallpa.
Menningarsjóður Lífspekifélagsins hafði umsjón með útgáfunni. Ljóð þessi höfðu verið geymd í gullskreyttu skríni í 400 ár norðarlega í Argentínu. Þau eru upphaflega rituð á quechua, máli Inkanna. Til aðstoðar við þýðingu ljóðanna yfir á spænsku, Poemas de Atahuallpa, var höfðinginn Tupac Rimachi. Mörgum árum síðar þýddi danskur skólastjóri ljóðin yfir á dönsku. Er hann síðan gaf Úlfi Ragnarssyni, lækni, ljóðin í jólagjöf 1983 varð Úlfur svo hrifinn af þeim að hann réðst ekki aðeins í að þýða þau, heldur málaði einnig einstaklega fagrar vatnslitamyndir innblásnar af sumum ljóðanna. Ljóð þessi eru einstök að frumleika og allri gerð og aðeins til á máli Inkanna, spænsku, dönsku og íslensku. Hönnun myndanna var í höndum Godds (Guðmundar Odds Magnússonar). Bókin verður til sölu í Bókaþjónustu félagsins.