Hvorki neytt matar né drykkjar í 70 ár

Austur á Indlandi eru vísindamenn ráðþrota yfir 81 árs einsetumanni sem kveðst hvorki hafa neytt matar né drykkjar í 70 ár. Hernaðaryfirvöld á Indlandi hafa tekið þátt í rannsóknum á öldungnum, í þeirri von að finna aðferðir fyrir hermenn til að lifa af hungur og harðræði.
 
Prahlad Jani fæddist 13. ágúst 1929 í litlu þorpi, en yfirgaf heimili sitt og fjölskyldu 7 ára til að lifa í frumskóginum. Fjórum árum síðar varð Jani fyrir trúarlegri reynslu og hann gerðist liðsmaður gyðjunnar Amba. Síðan hefur Jani kosið að klæðast sem kvenkyns áhangandi Amba, í litríkum kjólum, með skartgripi og blóm í hárinu.
 
En Prahlad Jani er enginn venjulegur klæðskiptingur. Margir líta á hann sem heilagan mann, enda hefur hann síðustu 40 árin búið í helli í regnskóginum. Hann vaknar klukkan fjögur á morgnana og ver tíma sínum í hugleiðslu.
 
Sjálfur segir Jani að gyðjan Ambi sjái honum fyrir næringu, sem drjúpi niður um gat á efri gómi.
 
Vísindamenn hafa í tvígang rannsakað Jani. Í fyrra skiptið var hann undir smásjá sérfræðinga í 10 sólarhringa, og fékk þá aðeins 100 millilítra af vatni á dag til að skola munninn og var þess vandlega gætt að hann spýtti því öllu út úr sér aftur. Hann fékk alls enga næringu þennan tíma, en virtist í engu tapa orku né kröftum.
 
Á síðasta ári tóku svo tugir sérfræðinga þátt í nýrri rannsókn, sem stóð í 15 daga. Jani fékk hvorki vott né þurrt allan þann tíma, og í lokin sögðu læknar að heilsa hans og líkamlegt ástand væri betra en hjá flestum jafnöldrum hans.
 
Vandlega var fylgst með líkamlegu ástandi og heilsu Jani, meðan á rannsókninni stóð. Það vakti mikla furðu þeirra að uppgötva að vökvi safnaðist í þvagblöðruna en skilaði sér ekki út hefðbundna leið, heldur virtist Jani á einhvern hátt geta endurnýtt þvagið með því að beita hugarorku.
 
Ýmsir vísindamenn hafa dregið í efa staðhæfingar Jani um að hann hafi ekki borðað áratugum saman, en hann er dyggilega studdur af indversku vísindamönnunum sem hika ekki við að tala um kraftaverk.

Athugasemdir

[Vilborg Eggertsdóttir, 22.4.2011 kl. 02:27]

~ chi ~ is the term for the universal energy, or the energy that permeates everything around us.

Það er vitað að það eru þó nokkuð margir sem eru löngu hættir að borða, enda tökum við inn orku -prönu- á margvíslegan annan hátt en í gegnum fæði, - vitum bara svo lítið um það

- Living on Light - The Source of Nourishment for the New Millennium -

[OM , 22.4.2011 kl. 13:27]

Satt er það, þetta eru engar nýjar fréttir :)