Mun maðurinn breytast?

 

Langflestir menn eru enn í því vitundarástandi að barátta og stríð eru möguleg. Á meðan svo er þá heldur sú barátta og þau stríð áfram. Ég er svo svartsýnn að segja að allar friðarumleitanir séu til lítils á meðan ekki er unnið að vitundarbreytingu mannsins. Allar ytri umbætur, hagræðing og jafnvel siðfræði, verða til lítils þegar hugarfarið er óbreytt. Og það sem meira er - friður og réttlæti mun ekki verða meðan vitundarlífið er óbreytt.

... eigi breyting að vera á manninum og athöfnum hans, verður að beina athyglinni að vitundarlífinu, t.d. gegnum hugleiðingu [öðru nafni hugleiðsla]. En flest allt fólk, jafnvel vel meinandi og friðelskandi, hlustar ekki á slíkt. ,,Hverju breytir þó setið sé og horft á nefbroddinn á sér?" er spurt. Fáir hafa vissu fyrir því að innangengt er milli manna, fáir vita um víðfeðmi vitundarinnar og því er þessi ótrú á hljóðu starfi sálarinnar.  

 

Birgir Bjarnason - Vitund, hugur og við