Er Guðseindin fundin?

 

Talið er að leit kjarneðlisfræðinga hjá CERN að Higgs-bóseindinni hafi borið árangur. Vísindamennirnir hafa notast við Stóra sterkeindahraðalinn á landamærum Frakklands og Sviss í leit sinni að eindinni.

Vísindamennirnir hafa boðað til blaðamannafundar þar sem niðurstöður tilraunanna verða kynntar. Ekki er vitað með vissu hvort að tilvist Higgs-bóseindarinnar verði staðfest á fundinum sem samkvæmt upplýsingum frá starfsmönnum CERN hafa tilraunirnar borið árangur.

Higgs-bóseindin er talin vera eitt dularfyllsta fyrirbæri náttúrunnar. Fyrstu hugmyndir um Higgs-bóseindin voru settar fram fyrir rúmum 40 árum. Í dag er hún þungamiðja í staðallíkani eðlisfræðinnar. Talið er að Higgs-bóseindin geti svarað spurningum vísindamanna um eðli alheimsins. Sumir eðlisfræðingar telja bóseindina bera ábyrgð á því að efni hafi massa.

Higgs-bóseindin hefur oft verið kölluð Guðseindin.

Tilgangur Stóra sterkeindahraðalsins hverfist þó ekki aðeins um leitina að Higgs-bóseindinni. Vísindamenn vonast til að þess að hraðallinn muni veita upplýsingar um upphaf alheimsins sem og eðli svarthola.

Stóri sterkeindahraðallinn er dýrasta og metnaðarfyllsta vísindaverkefni allra tíma. Hraðallinn er staðsettur á landamærum Frakklands og Sviss. Hann er á 175 metra dýpi og er ummál hans 27 kílómetrar.

Talið er að heildarkostnaður verkefnisins sé um 450 milljarðar íslenskra króna.

 

Sjá frétt: http://www.visir.is/er-gudseindin-fundin-/article/2011111209019