Það er líf eftir dauðann segir virtur taugaskurðlæknir

 

Hámenntaður læknir sem lærði í Harvard var í dái í sjö daga árið 2008 eftir að hafa smitast af heilahimnubólgu. Hann trúir nú staðfastlega á líf eftir dauðann.

Eben Alexander er virtur taugaskurðlæknir. Hann segir að sá hluti heilans sem stjórnar rökhugsun og tilfinningum hafi „slökkt á sér“ og upplifði hann  „eitthvað svo djúpt og magnað“ að það gaf honum, sem vísindamanni, ástæðu til þess að trúa því að meðvitundin lifi áfram eftir dauðann.

Í grein sem hann skrifar fyrir Newsweek lýsir hann fyrir lesendum hvert hann fór á meðan hann var í dáinu. Hann segist hann hafa komið á stað þar sem voru bleik og hvít ský og þar hafi hann hitt gullfallega bláeygða konu. Á þessum stað hafi einnig verið aðrar vængjaðar verur, mun þróaðri og æðri en mannkynið.

Fuglar og englar, þetta kom upp í hugann þegar ég hugsaði til baka. En ekkert af þessum orðum áttu við það sem ég sá og var ekki líkt neinu sem er að finna hér á jörðu.

Áður fyrr túlkaði Alexander frásagnir sjúklinga af reynslu þeirra af því að vera við dauðans dyr sem óskhyggju og hræðslu við hið óþekkta. Hann hefur nú skipt um skoðun og er í hópi fjölmargra sem trúa að lífið haldi áfram eftir að við drögum andann í síðasta sinn hér á jörðu.

Ég veit vel að þetta hljómar allt ótrúlega. Ef að einhver læknir hefði sagt mér eitthvað svipað þegar ég var að byrja hefði ég túlkað það sem svo að hann væri undir áhrifum eða haldinn ofskynjunum.

Læknirinn segir að upplifun hans sé langt frá því að vera ofskynjun og reynsla hans sé alveg jafn raunveruleg og t.d. brúðkaupsdagurinn hans eða fæðing barnanna. Hann bendir á að hann hafi í yfir áratug unnið sem taugaskurðlæknir á virtustu sjúkrastofnunum landsins og margir vina hans og félaga trúi því að heilinn skapi meðvitundina. Nú segir læknirinn að eftir reynslu sína sé hann viss um að ást Guðs og alheimsins á mannkyninu sé skilyrðislaus.

Alexander deilir nú skoðunum með fjölmörgum öðrum sem hafa dáið en snúið aftur til lífsins eftir að hafa verið endurlífgaðir.

 

Sjá: http://www.pressan.is/Frettir/Lesafrett/thad-er-lif-eftir-daudann-segir-virtur-taugaskurdlaeknir