Ekkert skiptir máli nema hið óþekkta

Vitundin getur eins og rifnað upp, upplifað geysisterkt allt hið skynjanlega, og þetta getur gerst svo snöggt og verið svo fíngert að erfitt reynist að taka eftir því.

Síðan verður allt aftur eins og áður, a.m.k. í langflestum tilfellum. Þetta ástand má segja að einkennist af vitundarglömpum og með auknum þroska verða þeir sífellt tíðari.

Þegar þeir hafa einu sinni byrjað þá er víst að á þeim verður framhald. Sá möguleiki yfirgefur okkur aldrei en við verðum jafnframt að beita hugann vissri ögun.

Ef þú hefur verið svo lánsamur að einhver þessara glampa hefur verið nægilega sterkur, þá hefur orðið breyting á lífi þínu sem verður ekki aftur tekin. Eftir það er um að ræða sífelldar breytingar á vitundinni, þótt þær geti komið í litlum skömmtum. Eftir slíkan glampa veistu að ekkert skiptir verulega máli í þessu lífi nema það sem við tekur en er ekkert nema óljós vitund um. Ekkert skiptir máli nema hið óþekkta. Þá veistu jafnframt að öll ánægja, allur auður sem þér kann að hlotnast, öll upphefð, sorg og gleði, skiptir ekki máli – er hégómi í samanburði við það sem getur orðið og mun verða.

Þessi vitneskja dvelur innra með þér jafnvel þótt þú gleymir þér um tíma í sorgar- og gleðidansi lífsins. 

Birgir Bjarnason – Vitund, hugur og við

http://www.hugleiding.com/Birgir.html