Nýárskveðja frá Þorgrími - Höfum hugrekki til að finna innri frið

Á tímamótum sem þessum veltir maður ómeðvitað fyrir sér bröltinu um krákustíga lífsins og leiðir hugann að hinum einna sanna tilgangi. Vitrir menn segja það tímasóun því sannleikurinn verði ekki ljós fyrr en lífinu lýkur og hið eilífa líf taki við. Engu að síður er okkur hollt að líta yfir farinn veg, skora okkur á hólm og breyta til betra vegar.

Þótt við séu jafn ólík og við erum mörg þráum við líklega öll eitt og hið sama: INNRI FRIÐ. Það kostulega er að þessa innri friðar eru mörg okkar að leita að fyrir utan okkur sjálf. Jafnvel á í kapphlaupi á eftir einhverjum hégóma sem skiptir engu mál þegar uppi er staðið. Hvers varð Nelson Mandela vísari þau 27 ár sem hann sat í fangelsi? Hvers varð Búdda vísari þegar hann hvíldi sig undir tré eftir að hafa leitað að „tilgangi lífsins“ um víða veröld? Það var ekkert týnt, sannleikurinn/friðurinn var innra með þeim.

Erum við flest ekki sífellt að leita langt yfir skammt? Í einhverjum þykjustuleik, jafnvel til að þóknast öðrum og er það ekki furðulegt að sjálfstraust sumra skuli markast af áliti annarra á þeim?

 Lífið getur verið kostulegt og leiða má að því líkum að tilgangur lífsins sé að sigrast á sjálfum sér og er það ærið ævistarf. Flest erum við að glíma við fordóma og dómhörku, við tjáum okkur hugsunarlaust þegar okkur mislíkar eitthvað, oftast af því það hentar ekki okkar eigin skoðunum, lífsviðhorfi, jafnvel þótt við höfum litlar sem engar forsendur til að setja fram skoðun. Þetta má líklega rekja til eigin vanlíðunar og skorts á hugrekki til að takast á við okkur sjálf.

Megi árið 2014 vera árið sem við glímum við okkur sjálf og höfum hugrekki til að finna þann innri frið sem bíður óþreyjufullur eftir okkur. Teljum upp á milljón áður en við hyggjumst tjá okkur á neikvæðan máta og gjöldum illt með góðu!

 

Sjá:  http://www.dv.is/folk/2014/1/1/thorgrimur-hofum-hugrekki-til-ad-finna-innri-frid/