Andleg efnishyggja

 

Við erum hið guðlega alveg eins og gangstéttarhellurnar sem við göngum á eða dauð trjágrein við vegarbrúnina. Í rauninni er enginn munur á djúpeðli veru okkar og hvaða hlutar sem er. Aðeins er um að ræða mismunandi „yfirborð". Í okkar augum er þessi mismunur mjög mikilvægur. Við höfum svo rækilega samkennt okkur þessum mismuni að hann markar allt okkar viðhorf og gerir okkur að því sem við erum. Þetta er upphafið á sorgarleik okkar andlegu fátæktar.

   En við hrökkvum við þegar við heyrum að steinn eða dauð trjágrein feli í sér hið guðlega, en það stafar af því að við vitum ekkert um hið raunverulega eðli þessara hluta. Það sem við höfum í huga er einungis huglæg túlkun á útliti og ytra borði þessara hluta eins og skynfæri okkar skynja þá. En þeirra raunverulegi efnislegi veruleiki er gjörólíkur þessu. Jafnvel hið litla sem nýjustu rannsóknir og uppgötvanir í eðlisfræði hafa leitt í ljós hafa gefið okkur mikið og margt til þess að hugsa um.

   Þekkingarskortur á raunverulegri gerð efnisins olli svartsýninni sem einkenndi sum form efnishyggju á liðnum öldum. Við getum tekið þannig til orða að efnishyggjumenn fortíðarinnar hafi tilbeðið guð sem þeir þekktu ekki. En nú er svo komið að „guð efnisins" hefur tekið ofan grímu hins jökulkalda óhreyfanleika, og sjá! hann hefur breytzt í undursamlega hreyfingu, sem er fljótandi, óáþreifanleg orka. Svipur hans sem áður var myrkur og þungbúinn, lýsist nú æ betur upp í geislandi skírleika. Hið þögla, lýsandi ævintýraland sem birtist í hinu smæsta sandkorni tekur langt fram stórfenglegustu flugeldasýningu sem við getum ímyndað okkur.

   Myndin sem eðlisfræðingarnir draga upp fyrir okkur af innri gerð efnisins fær á sig svo andlegan blæ að engu er líkara en að nútímaeðlisfræði sé farin að stuðla að myndun andlegrar efnishyggju.

 

Robert Linssen

 

 

Efnið að ofan er tekið úr Ganglera frá árinu 1969. Hægt er að kaupa gömul hefti af Ganglera í Lífspekifélaginu fyrir 100 kr. 

 

Sjá efnisskrá Ganglera frá 1926 hér: https://www.gudspekifelagid.is/gangleri/Efnisskra-%20Ganglera.pdf