Sterk hugleiðslutækni sem allir geta lært - Brahma Kumaris

 

Sterk hugleiðslutækni sem allir geta lært.

Við Bakkabraut í Kópavogi er heilagt hús er heitir Lótushús. Þar er hugræktarskóli undir merkjum Brahma Kumaris. Annar húsráðenda er Sigrún Olsen.

 

 ,,Þessi skóli er ættaður frá Indlandi og hann er rekinn af konum í yfir hundrað löndum. Hér á Bakkabraut er eina íslenska útibúið og hefur verið frá 1999. Skólinn er mjög mikið sóttur, við auglýsum aldrei en hér er alltaf fullt,” segir Sigrún Olsen þegar hún byrjar frásögn sína af setrinu við Bakkabraut sem ýmist gengur undir nafninu Raja Yoga miðstöð, Lótushús eða Brahma Kumaris.  Þangað sækir fólk andlega þekkingu og hugleiðslu. Raja Yoga er í rauninni hið upphaflega jóga, að sögn Sigrúnar. Það byggist ekki á líkamsæfingum heldur er einungis fyrir hugann og í rauninni dýpra en það. ,,Þetta er mjög sterk hugleiðslutækni og jafnframt mjög einföld þannig að allir geta lært hana,” segir hún. ,,Fólk er að kynnast sínu sanna sjálfi. Þá á það auðveldara með að tengja sig hinu æðsta. Það er það sem Raja Yoga þýðir, ,,eining við hina æðstu sál”.

 

 

Sigrún segir nám við skólann rekið af frjálsum framlögum nemendanna. ,,Menn leggja með sér eins og þeir geta og vilja,” segir hún og bætir við að sömu nemendurnir séu árum saman í skólanum. ,,Maður er aldrei útlærður. Það er alltaf hægt að kafa dýpra og dýpra.”

 

 

Skólinn, sem nú heitir Brahma Kumaris World Spiritual University, var upphaflega stofnaður árið 1936 á Indlandi. Höfuðstöðvarnar í dag eru á Abu-fjalli í Rajasthan. Þar kveðst Sigrún hafa kynnst honum árið 1997, ásamt manni sínum Þóri Barðdal. Nú fara þau þangað árlega ásamt öðrum nemendum og dvelja í tvær til fjóar vikur. Áður ráku þau hjónin heilsubótardaga á Reykólum í tólf eða þrettán ár. ,,Þar var mikið hugleitt og snæddur heilsusamlegur matur,” rifjar Sigrún upp.

 

 

Í Lótushúsi kemur fólk á öllum tímum að sögn Sigrúnar. Sumir koma á hverjum morgni klukkan sex allan ársins hring, stunda hugrækt í staðinn fyrir líkamsrækt. Aðrir koma einu sinni í viku og fá stuðning en hugleiða sjálfir heima þess á milli. Fólk úti á landi er í netsambandi og kemur svo í skólann þegar það er í bænum. ,,Starf Brahma Kumaris fer líka fram í fangelsum, á sjúkrahúsum og í skólum,” lýsir Sigrún. ,,Í sumar ætlum við að ferðast hringinn í kringum landið í fyrsta sinn. En við höfum þegar farið víða og ætlum í Borgarnes um næstu helgi.”

 

 

Grein sem birtist í Morgunblaðinu   22. maí 2006.

 

 

 

 

Sjá: http://www.lotushus.is/index.htm 

Sjá hugleiðslunámskeið hjá Brahma Kumaris í júní og júlí:

http://www.lotushus.is/namskeidid/juni/index.htm og

http://www.lotushus.is/namskeidid/juli/index.htm