Dagurinn í dag

 

Hugleiðing dagsins:
Tveir eru þeir dagar í viku hverri sem við ættum ekki að hafa áhyggjur af, tveir dagar sem við ættum að hugsa um án ótta og kvíða. Annar þeirra er gærdagurinn, með mistökum sinum og áhyggjum, göllum og glappaskotum, verkjum og kvölum. Gærdagurinn er að eilífu horfinn undan yfrirráðum okkar. Allur auður veraldar gæti ekki fært okkur gærdaginn aftur. Við getum ekki afmáð eitt einasta viðvik. Við getum ekki tekið aftur eitt einasta orð sem við sögðum. Gærdagurinn er að eilífu liðinn. Hef ég enn áhyggjur af því sem gerðist í gær?

Íhugun dagsins:

"Trúin er fullvissa um það, sem menn vona, sannfæring um þá hluti, sem eigi er auðið að sjá." Trúin byggir ekki á sjón, heldur trausti. Um aldaraðir hafa verið uppi menn, sem höguðu lífi sínu eftir æðri forsjón, sáu ekki guð en trúðu á hann. Og þeir hlutu umbun fyrir trú sína. Á sama hátt fer fyrir þér. Góðir hlutir gerast hjá þér. Þú getur ekki séð Guð, en þú getur séð ávöxt trúarinnar í mannlegu lífi, séð það breytast úr óförum til sigurs. Náð Guðs er föl öllum sem trúna hafa, sem sjá ekki en trúa samt. Trúin getur veitt sigursæld og hamingju inn í lífið.

Bæn dagsins:

Ég bið að hafa nægan trúarstyrk til þess að trúa án þess að sjá. Ég bið að vera ánægður með ávöxt trúar minnar.

Úr 24 stunda bókinni